來論｜用去旅行的預算來移民？　黃人無知「Laugh die me」

稀思路/筆是機場

因為黃人近年鼓吹「出走」，所以不論係攬炒派政客以至一眾黃人，都好鍾意講移民甚至付諸實行；有啲人話，移民要揀個適合地方，亦要揀個「教育制度好」嘅地方；有啲就話天氣好緊氣，唔好去啲天氣灰灰沉沉嘅地方。其實，佢哋全部都錯晒重點，移民邊度未必係最緊要，移民最緊要係有錢！你有錢，你去到非洲都可以做土皇帝；無錢？Sorry，去到邊都係「一身蟻」，以下呢個黃人故事，就係一個好例子。

最近，有黃人喺網上分享經歷，原來佢上年因為「俾人炒，心情差」，聽人講移民英國只需5萬元，於是真係去咗英國，點知出晒事，正考慮回流香港。原來，呢位黃人一去到，就遇上好嚴峻嘅問題，因為喺英國，好多嘢要有信用紀錄做擔保，居住證明、工作證明「必不可少」；要租地方住，無信用紀錄就要交足一年租；無地址證明呢，又搵唔到工喎。其他生活方面，英國啲嘢食更加係又貴又唔好食，難怪呢位黃人萬念俱灰，想返香港啦！

對於攞住幾萬元就想移民英國，容許筆者講句，黃人實在太天真喇！如果大家覺得喺香港用50元食個茶餐廳套餐好貴，筆者同大家講，如果大家去英國食個好普通嘅All day breakfast，閒閒地都百幾元一餐，仲要係唔好食果隻；租屋呢，先唔講無信用紀錄要俾一年租金，其實英國租金近年係咁升，依家房屋平均月租亦大約要一萬元。食又貴、租又貴，幾萬元「預算」，如果去英國旅行兩星期應該無問題，移民？Laugh die me la！(稀思路英語教室-「笑死我」的正確講法為: Laugh my head off )

另外，故事中嘅黃人話自己因為無址證明所以難搵工，實情係，就算俾你有地址證明，搵工一樣唔容易。大家要明白一點，喺疫情之下，英國經濟唔係特別好；有好工，最先就係留俾英國人做；其次，英國人唔做，由歐洲其他地方去英國嘅人做，都未必到亞洲人做。可能100個移民英國嘅人，有幾個至十個可以搵到Okay嘅工，但其他果啲，就算唔失業，可能都只能做體力勞動工作，香港人歎慣、串慣，點會習慣？

老實講，喺香港，黃人可能覺得自己「惡晒」，所以去到英國，應該仲有一點佢哋會好唔慣，就係英國處理示威、騷亂等問題，係絕對唔會手軟。筆者睇新聞，近日英國內政部有公告，喺新嘅《警察、罪案、判刑和法院》法例草案下，所有襲擊警隊、緊急事故支援人員嘅最高刑罰，將會加至雙倍；如果黃人去到英國仲係咁鍾意示威、搞事，俾人拘捕同檢控，刑罰分分鐘會被double up。有時候，見到一班黃人離開香港，會有種「香港少咗啲搞事分子」嘅想法，但當見到呢啲人上網呻喺英國生活唔到，甚至住都無得住果時，有時候真係唔知應該同情佢哋，定覺得佢哋係咎由自取。