（香港文匯報記者 文根茂）美國國會日前舉行特別聯席會議，打算確認美國總統大選嘅選舉人團投票結果，大批特朗普支持者闖入國會大樓，企圖推翻大選結果，有如香港修例風波期間黑衣暴徒衝擊立法會的翻版。在修例風波期間，美國政棍不斷美化香港的暴亂分子，形容之為「美麗的風景線」，更窩藏當時在香港帶頭衝擊立法會嘅通緝犯，所以𠵱家佢哋發生咁嘅事，唔少人都感嘆天道有輪迴。今次美國同其他西方國家嘅反應，同對待香港嘅暴亂大相逕庭，公開「譴責」美國示威者嘅暴力，而香港「泛民」更集體失聲，赤裸裸地暴露了這些西方國家的雙重標準。

美警開槍 港警克制

數以百計嘅特朗普支持者衝擊國會外圍，突破大門與安保，闖入國會建築中，並一度抵達參議院嘅樓層同埋眾議院議長佩洛西嘅辦公室。美國即時出動國民警衛軍，喺國會內真槍實彈攻擊「手無寸鐵」的「示威者」，國會外動用催淚彈、閃光彈、胡椒彈等清場，導致嚴重嘅警民衝突，更造成至少4人死亡。

香港暴徒當日衝擊立法會嘅情況比美國嚴重得多，但香港警方極之克制，當時並無使用任何真槍實彈，更冇造成任何傷亡。

全國政協副主席梁振英噚日喺facebook發帖話，「真誠的問問『泛民』，你們不斷追求美國的制度，說什麼政權順利移交，說什麼自我糾正，說什麼有暴徒攻入立法會是因為香港沒有民主。」請佢哋就住呢啲再諗一諗呢。

國內零容忍 國外昧良心

香港攬炒派嘅暴力行為就算幾咁嚴重都好，啲西方國家都始終唔願意譴責暴力，仲昧住良心，為咗自己嘅利益美化香港暴徒，針對香港執法機關。不過，今次美國事件發生後，英國首相約翰遜、加拿大外交部、法國外交部等多個國家領袖就第一時間出嚟譴責暴力，不過就冇制裁向「市民」開槍嘅美國警方。美國同埋佢哋嘅媒體當然都係對自己國內嘅暴力零容忍，而香港所謂追求「民主自由」嘅攬炒派亦都冇晒聲。佢哋成個表現反差咁大，唔怪得啲人揶揄佢哋係「國際馳名雙標」。

民建聯立法會議員張國鈞喺facebook貼相顯示，美媒CNN將香港衝擊立法會啲人稱為「Protesters（示威者）」而就叫衝擊美國國會嘅人為「Rioters（暴徒）」，話：「大家都係搞『暴力抗爭』，點解一年多啲之前就話支持，而（）家又轉晒口風 。」 

民建聯立法會議員陳克勤就注意到「小黃人」嘅表現，佢貼圖顯示，喺香港發生衝擊立法會事件時，啲「小黃人」話「正呀！衝呀！」而當美國暴徒衝入 國會破壞，啲「小黃人」嘅反應變成無言。

工聯會立法會議員郭偉强同樣喺facebook話香港嘅破壞者入到議會嘅行為，比今次美國嘅示威更嚴重，包括塗污大量牆壁，敲碎大量玻璃外牆，拆開電腦拿走硬碟，破壞器材，爆開職員儲物櫃偷走財物等，佢感嘆美國多個政客都鬧爆破壞者，但佢哋對香港嘅情況「就大讚香港的黑暴破壞者和啦啦隊」。

既然美國國務卿蓬佩奧公開譴責暴力，要求將啲示威者繩之以法，梁振英就一語中的問：「美國政府會把梁繼平（涉嫌參與衝擊立法會，現在美尋求「政治庇護」）遣返香港接受法庭審判嗎？」個答案大家心照啦。

CNN：證國安法必要

好多嘢，惟有發生喺自己身上先有發言權。之前香港實施香港國安法，美國係咁搵藉口譴責，生怕香港穩定發展影響佢哋利益。點知美國單嘢發生後，佢哋嘅CNN政治評論人就直言啲示威者侵佔國會係「叛國」行為，仲要話：「證明了國安法有關保護國家安全的條文也是需要的。」所以下次講人哋國家同地區嘅嘢要留啲口德啦。

特朗普被禁言 同失言論自由

對美國等西方國家欠缺認識嘅「黃絲」成日都幻想嗰邊係「自由天堂」，講乜做乜完全唔使受到規限，仲要將自己幻想中嘅一套嘢搬返香港。而早前特朗普喺社交平台胡言亂語，就即刻被暫停使用賬戶，唔知啲「黃絲」對此作何感想呢？

特朗普早前喺Twitter發布一段視頻，要求啲示威者「和平回家」，但就冇譴責暴力，仲要仍然聲稱自己係「選舉舞弊的受害者」。Twitter、facebook同埋YouTube等社交平台隨即以鼓勵暴力為由將特朗普嘅視頻撤下，Twitter、facebook同埋Instagram仲要先後暫停佢嘅賬戶，因為佢嘅唔準確、煽動性帖文。梁振英就喺facebook直言：「美國沒有言論自由。」

舉「港獨」旗圍美國會 網民：害人終害己

（香港文匯報記者 黃書蘭）香港立法會前年遭黑暴嚴重破壞，美國政府就肆意美化有關人等的暴行，更收容畏罪潛逃嘅黑暴分子，但當美國有示威者闖入國會時，即被美方開槍擊斃，雙重標準可見一斑。有網民發現，美國國會示威現場竟有人舉着香港黑暴分子嘅「時代革命」旗幟，唔少網民都笑美國政府引狼入室，今次害人終害己。

美國政府一直包庇香港黑暴分子，美國國會眾議院議長佩洛西早前就以「美麗的風景線」美化香港黑暴惡行，美國眾議院上月更通過所謂《香港人民自由和選擇法案》，想以所謂「讓無法證實的『受迫害者』獲得難民身份」，收容更多香港黑暴分子，惟議案未能在參議院通過。

美國國會日前發生示威，有闖入國會嘅當地示威者俾美方開槍擊斃。醜聞纏身嘅「過氣歪星」阮民安（Tommy）噚日就喺facebook上載一張照片，話美國國會現場出現香港黑暴分子嘅「光時旗」，仲叫在場「手足」「加油，平安！」

有「手足」就覺得班示威者係想將香港黑暴破壞立法會，喺美國重演。「Apeiron Cheung」咁講：「美國重演71立法會。」

陳克勤：昔縱暴 今報應

民建聯立法會議員陳克勤噚日就喺fb發帖：「美國政府一直縱容和美化香港黑暴，更加收容破壞立法會的逃犯梁繼平。」佢認為今次事件係「天理循環，報應不爽。」佢仲將美國政客縱容香港黑暴嘅言論回帶反贈美方：「今天美國國會被闖入和破壞，我用美國縱暴政客的語言回應：『美國當局應該馬上停止射殺示威者，克制使用過分武力。』」

全國政協委員、基本法研究中心主任胡漢清都有回應件事，佢對美國兩黨同時譴責示威者的暴力衝擊，但就未發聲譴責警察「過度使用武力」，處理手法同之前香港黑暴明顯有別，批評係「美國的虛偽」，奉勸美國「唔好自己住喺玻璃房，仲要向人哋扔石頭」。

唔少網民就覺得美國呢個始作俑者一直縱容、收容香港黑暴分子，今次引狼入室、自作自受。「陳文」就話：「可能收留暴徒多了。」「Man Keung Ho」都話：「原來真係有因果，美國支援香港黑暴，現在回歸美國，好！」「Marvin Wong」亦話：「鼓吹所謂民主，但最後變成暴動，最後害人終害己！報應！」